Die "Tappits" van Chaucer straat (deel een)

Aan almal van julle wat Marlene van Niekerk se Triomf gelees het wil ek net sê: As ek 23 jaar gelede begin het om my skoonfamilie se petaljes te boekstaaf sou ek vandag 'n "bestseller" kon skryf wat Pop, Treppie en Mol na Sondagskoolkinders sou laat lyk.

Kom ons begin maar by gister en vergeet wat die afgelope 23 jaar al gebeur het vir eers. Kom ek so pas uit 'n vergadering uit toe kom daar sommer twee "please call" sms'e deur van swaer Dirk af. Of sal ek sê skoonsuster Dirk want hy "bat" vir die ander span en ons almal weet seker hoe 'n histeriese kompos cowboy kan tekere gaan.

Nou kyk, as ek 'n "please call" van die skoonfamilie af kry beteken dit net een van twee dinge: Geld leen of 'n bakleiery tussen hulle, dus bel ek nie sommer terug nie.

Hoekom weet ek nou nog nie, maar gister bel ek toe terug. Tot my bittere spyt. "Die hele familie is hier om my te kom bliksem", seg hy. Net so. Hoekom? "Ek het vir Hester 'n hoer genoem" Hoekom? "Sy het my 'n pedofiel en 'n moffie en 'n kindermolesteerder genoem"

Hester is nou sy suster en sy buurvrou tegelykertyd. Moeilike situasie. teen die tyd wat ek daar aankom om die situasie te probeer beredder is die polisie gelukkig al klaar daar. Die bure hang soos vinke aan die heinings.
Skindermateriaal vir 'n hele week het so pas weer reg voor hulle oë afgespeel.

Die uiteinde? Hulle gaan vir hoogstens 'n week nie met mekaar praat nie, dan gaan hulle tjommas maak tot en met die volgende baklei.

Liewe hemel, daar's nie eens drank betrokke nie! Donnerse tappits!